३६ वर्षीय अर्जेन्टिनी खेलाडीले थपिएको चौथो मिनेटमा गोल गरेका थिए । मेस्सीको डेब्यू खेल हेर्न करिब २० हजार समर्थक मैदानमा पुगेका थिए । लिब्रोन जेम्स, सेरेना विलियम्सजस्ता खेलाडीहरूसमेत दर्शक दीर्घामा उपस्थित थिए ।
‘हामी यसरी नै जीतबाट सुरुवात गर्न चाहन्थ्यौँ,’ खेलपछि मेस्सीले भने, ‘च्याम्पियनसिपमा जीतबाट सुरुवात गर्नु हाम्रो लागि महत्त्वपूर्ण थियो । भाग्यवश हामीले अन्त्यमा त्यो हासिल गर्न सफल भयौँ । म निकै खुसी छु ।’
मेस्सीको गोलपछि डीआरभी पीएनके स्टेडियममा गुलाबी रङका धुवाँ छरिएको थियो भने केही फ्यानहरू मैदानमा नै प्रवेश गर्ने प्रयास गरेका थिए ।
मेस्सीलाई गत आइतबार समर्थक सामु प्रस्तुत गरिएको थियो । सातपटकको बालोन डि’ओर विजेता खेलाडी २ वर्ष फ्रेन्च क्लब पेरिस सेन्ट जर्मेनमा रहेर यो सिजनबाट एमएलएस आइपुगेका हुन् । पेरिसमा रहँदा उनले ७५ खेलमा ३२ गोल गरेका थिए ।
